تعظيم سلام للشهدا صالح الغازي

تعظيم سلام للشهدا صالح الغازي

Postby Saleh Elghazy » Wed Mar 09, 2011 8:08 pm

تعظيم سلام للشهدا
صالح الغازي

Image


ايد واحده


في جسم الجبل طلعت الأعشاب .
طلع الشباب المُلهم
صحي العايمين علي وش المايه
مع الرغاوي والغرقى والغربة عن الأحلام.
شعب بحاله انطلق مُسالم.
بدَفعة تعاسة عُمر فات .
خرج التور عن مساره
اتعلقنا في أحلامنا
لوحنا بايدينا
غنينا ونادينا علي الحرية
غرز قرونه في بطن مين؟
طلق رصاص
قنابل ..
دم وسط الدموع والغيوم
مين اللي وقع ؟
مين اللي حاطط ودنه ع الأرض
بيسمع صوت الحياه الجاي؟
مين اللي حاضن الأرض
وسابها حبلي في الأمان ؟
كل طيور الحب خارجه من قلبه .
بتحوم حوالين الميدان.
تعظيم سلام للشهيد.
قلنا :قول فهمتكم
قال: ح أضلل ع العيدان م الشمس .
شوفنا الخوف في عينيه
شوفنا في ايديه الدم.
شبكنا الايدين في بعض .
قفز ...
طار ...
لفتين في الهوا
ووقع ع الخازوق
ولا مليون تور يعوضوا ضوفر شهيد.






ألاعيبك بطَّلها بقه

مكاني رجعلي
لقيت فيه تعبان ملون.. رُفيع
خرجت بسرعه
وف خيالي ملمسه الناعم
وهو بيغتالني
رصدته لقيته ما بيتحركش
فتحت ورميته بالشبشب
ما اتحركش
لقيته مجرد حبل
ده وهم
والا ح يظهر بشكل تاني
في ناحيه تانيه.

الفوطه الصفرا شلتها م البروفايل

لما كان يضيق صدري
والخوف يملكني
انزل تحت
بفوطه صفرا ألمع البقع السوده
اللي في حياتي
عشان أعيش فيها
لكن من ساعة ما وقفت علي رجلي،
طلعت لفوق لميدان التحرير.
التاريخ مابقاش يزيف،
الانتماء ما عدش كلمه تقيله ،
بقيت رافع راسي
وحاطط علم مصر علي البروفايل .

Saleh Elghazy
 
Posts: 22
Joined: Wed Mar 09, 2011 7:25 pm
Location: egypt


Return to Events / أحداث هامة

Who is online

Users browsing this forum: No registered users and 3 guests

cron